Якуб Колас

Ці коска зазвоніць у час касавіцы,
        Ці песню дзяўчо запяе,
Ці неба заззяе ў агнях бліскавіцы,
        Ці вецер задзьме-зазлуе,

Ці гром гучнабежны пракоціцца ў хмарах,
        Ці грукне над лесам пярун, —
Усё адклікаецца ў вольных абшарах,
        Ўсё іх дакранаецца струн.

А ты, калі гора каго напаткае,
        Ці жальба пачуецца, плач,
Або запануе дзе крыўда ліхая —
        На ўсё адгукніся, адзнач.

А радасць пачуеш, надзеі ўзаўюцца,
        Каб добрыя весткі падаць,
Няхай тады струны твае засмяюцца
        I песняю шчасця гучаць.